कौला कछला असोज कार्तिक शरदया ऋतु रे

 

Music : Gujje Malakar
Lyrics : Durgalal Shrestha
Singer : Rani Shobha Maharja & Swasti Maharjan
कौला कछला असोज कार्तिक शरदया ऋतु रे
उकिइ हे दु मोहनि व स्वन्ति नखः झीगु रे

थिंला पोहेला मंसीर पुस हेमन्तया ऋतु रे
उकिइ हे दु यःमरि पुन्हिं न्हेगां जात्रा झीगु रे

सिल्ला चिल्ला माघ फागुण शिशिरया ऋतु रे
उकिइ हे दु घ्य: चाकु संल्हु सिलाः चःर्हे झीगु रे

चउला बछला चैत बैशाख बसन्तया ऋतु रे
उकिइ हे दु पाहां चःर्हे बिस्का जात्रा झीगु रे

तछला दिल्ला जेठ असार गृष्म ऋतु रे
उकिइ हे दु सिथि नखः गथांमुगः झीगु रे

गुंला यंला साउन भदौ बरखाया ऋतु रे
उकिइ हे दु गुन्पुन्हि व यंया पुन्हि झीगु रे