छ न वा जि न वय् पासा

नेवाःत सकलें क्वाहां वय् माल हाला च्वंपिं हालां तुँ च्वन अझं आपालं नेवाः त पिहां मवः सःले सः तः मवः ।
थज्यागु हे पहलं ल्युने झी लात
भाय् संस्कृति लिपि थाय्‌बाय् न्हन
थःगु हे थास्य् नेवाःत मालेमाल
हलिमं तनी नेवाः झीसं चायेकेमाल


अय् नेवाः धाःपिं गथे झीसँ लोमंकेफत
पृथ्बीनारायण झी अजा अजि स्यात
अय्‌न नेवाः तय्‌सं उकि कम्प्रोमाइज यात
थ्व दिनंनिसें झी ल्यूने लात

जुजु धाइपिं  द्यः मेपिं सकलें च्यः
 थ्व खँ सकसिनं उबले थुइकल
थ्व द्यःधाःपिं दथुया ल्वापुं
जनताया सुख तकं तंकल

स्यंपिं जुजु बुकाः राणा न्ह्यःने वल
झीत दुःख बीपिं मनुतय् हुल मुन
झीगु भासं च्वयेवं जेलय् कुने यन
छगु सफु लुतं जरिवाना यात

भिंगु खँ कंपिं भिक्षुपिन्त देसं पितिन
थःगु हे देसय् दास जूगु थुयाः वल
सःतःपिं गुलिं स्यात गुलिं कुने यन
लोमंके फूगु गथे छं अय् नेवाः ??

७ सालय् देसय् प्रजातन्त्र वल
झि दँ मतुल थन हान पञ्चेत दन
पञ्चायतं झीत झन् झन् क्वत्यल
न्हुगु दँया भिन्तुना तकं धायेमन्त



छ न वा जि न वय् पासा
झी सकलें थौेंं मुन धाःसा
गथे मवै थन ह्युपा

छगु लिपि भाषा धर्म अले संस्कृति
मेपिं दक्वं जाति भाषा देसं कतः खन
छगु भाय् ल्हाइपिं जक न्ह्याथाय् नं थ्यन
व हे पहः थौं तक ल्यन

४७ सालं  प्रजातन्त्र वल हँ धाल
झीगु भाग्य हिलीगु दिं मवल
थःगु वदाय् अले नगरपालिकाय् तकं
थःगु भाय् छ्यलेमदु धाल सर्वोच्चं

ज्यापुया चःतिं प्याःगु बुँ मन्त
जात्राया सम्पत्ति कया धुकु बन्द
थःगु भासं आखः ब्वने सुनां न मखन
सरकारी जागीर म्हगसय् न मम्हन

कुंकुनां स्वनिगलय् मुनेगु अप्वल
लः फय् जाकि तकं थौं झीत मथल
पुलां जुयावंगु नेवाः छेँय् बुलुहुं दुन
अझं शत्रु तयेसं पाःताः यात स्वयाच्वन



छ न वा जि न वय् पासा
झी सकलें थौेंं मुन धाःसा
गथे मवै थन ह्युपा:

थजाः क्वजाः मिसा मिजं भाषा संस्कृति
च्वय् क्वय् सुं मखु सकलें उति
थःगु थासय् थःम्हं शासन याये दयेमां
झीगु सः थन सुइमज्यु छतिं

झीगु अधिकार  तंगु दु
देसं  क्रान्ति फ्वंगु दु
छंगु जिगु झीगु अधिकार कायेगु जुइ
सकलें छधी छप्पं जुया ल्वायेगु जुइ
छ न वा जि न वय् पासा
झी सकलें थौेंं मुन धाःसा
गथे मवै थन ह् युपा: